Zemen Bank has received Certificate of Membership from Ethiopian Coffee and Tea Authority

 


ምርት ገበያ 42 ቢሊዮን ብር የሚጠጋ የሽያጭ ሒሳብ ማስተላለፉን አስታወቀ

ምርት ገበያ 42 ቢሊዮን ብር የሚጠጋ የሽያጭ ሒሳብ ማስተላለፉን አስታወቀ

የኢትዮጵያ ምርት ገበያ ከ16 ባንኮች ጋር በሚያካሂው የክፍያ ማስፈጸሚያ ሥርዓት አማካይነት ከ41.9 ቢሊዮን ብር ከገዥዎች የባንክ ሒሳብ ወደ ሻጮች የባንክ ሒሳብ በማስተላለፍ ግብይት መፈጸሙን፣ የምርት ገበያው ተቆጣጣሪ የኢትዮጵያ ምርት ገበያ ባለሥልጣን አስታወቀ፡፡

ባለሥልጣኑ ሐሙስ መስከረም 21 ቀን 2013 ዓ.ም. ግብይት በማስፈጸም የሚሳተፉ ባንኮችን ወደ 17 ለማሳደግ ከዘመን ባንክ ጋር ስምምነት በተፈራረመበት ወቅት የባለሥልጣኑ ዋና ዳይሬክተር ዑሌሮ ኡፒየው እንደገለጹት፣ በ2012 ዓ.ም. 41.9 ቢሊዮን ብር ከግዥ ፈጻሚዎች ሒሳብ ወደ ሽያጭ ገንዘብ መቀበያ የባንክ ሒሳብ ያለ ምንም ግድፈት መተላለፉን ተቋሙ አረጋግጧል፡፡ ይህ መጠን በ2011 ዓ.ም. ከነበረው 34.7 ሚሊዮን ብር የገንዘብ ዝውውር መጠን አኳያ፣ የ20.95 በመቶ ጭማሪ ያሳየ ስለመሆኑ ያመለክታል፡፡

በ2012 ዓ.ም. በ16 የምርት ገበያ የክፍያ መፈጸሚያ ባንኮች አማካይነት 4,768 የምርት መግዣ የገንዘብ ማስገቢያ ሒሳቦች ተንቀሳቅሳል፡፡ በዚህም 969 የአባል፣ 168 አባል ያልሆኑ ቀጥታ ተገበያዮችና 3,631 ደንበኞች ተስተናግደዋል፡፡ እንዲሁም 7,831 የምርት ሽያጭ ገንዘብ መቀበያ የባንክ ሒሳቦች 1,004 የአባል፣ 208 የአባል ያልሆኑ ቀጥታ ተገበያዮችና 6,621 ደንበኞች በምርት ገበያው አባላት ተከፍተው ለራሳቸውና ለደንበኞቻቸው አገልግሎት በመስጠት ላይ እንደሚገኙ ምርት ገበያው አስታውቋል፡፡ ከእነዚህ ውስጥ 29.7 በመቶው በኢትዮጵያ ንግድ ባንክ የሚገኙ ሲሆኑ፣ የቀሩት በ16 የግል ባንኮች የተከፈቱ ሒሳቦች መሆናቸውን ምርት ገበያው አስታውቋል፡፡

የምርት ገበያ ባለሥልጣን የገንዘብ ዝውውሩ መመርያውን ጠብቆ እንዲፈጽም ቁጥጥር ያድርጋል፡፡ ነገር ግን በክፍያ ፈጻሚ ባንኮች አተገባበር ላይ ከቴክኖሎጂ ጋር የተያያዘ ችግር ሲያጋጥም መቆየቱን ዋና ዳይሬክተሩ አስታውሰዋል፡፡ ለምርት ገበያው ሒሳብ የሚያስተላልፉ የምርት ገበያ አባላትና ደንበኞቻቸው፣ በዕለታዊ የግዥ ገንዘብ  ቅብብሎሽ ላይ የሚፈጠር ስህተት ሲያጋጥም እንደቆየ ተጠቅሷል፡፡

በባለሥልጣኑ በተደረገ ክትትልና ቁጥጥር ተቋማቱ ከዚህ ቀደም በሰው ንክኪ ይከናወኑ የነበሩ ሥራዎች በቴክኖሎጂ ታግዘው እንዲሠሩ በመደረጉ ችግሩ በከፍተኛ ደረጃ እየቀነሰ መጥቷልም ብሏል፡፡ 

በዕለቱ ከምርት ገበያው ጋር አገልግሎቱን ለመስጠት ስምምነት የተፈራረመውን ዘመን ባንክ ጨምሮ ባንኮች የአባላትና የደንበኞች የባንክ ሒሳብ ተለይቶ በአግባቡ እየተያዘና የሚያዝ በመሆኑ ደንበኞች ሰፊ የባንክ አማራጮች እንዳሏቸውና አገልግሎት አሰጣጥ፣ ተደራሽነት፣ ቅልጥፍና ከዓመት ዓመት እየተሻሻለ መሆኑን ለማረጋገጥ ስለመቻም ይጠቁማል፡፡

ምርት ገበያው ሥራ ሲጀምር በምርት ገበያ ባለሥልጣን ዕውቅና ተሰጥቷቸው የሚካሄዱ ግብይቶችን ክፍያ የሚያስፈጽሙ ባንኮች የኢትዮጵያ ንግድ ባንክና ዳሸን ባንክ እንደነበሩ የሚታወቅ ሲሆን፣ ዘመን ባንክ አክሲዮን ማኅበር በምርት ገበያው ክፍያና ርክክብ የማስፈጸም ሥራ ለመሥራት ዕውቅና በማግኘቱ በምርት ገበያው የክፍያ መፈጸሚያ ባንኮች ቁጥር አሥራ ሰባት ደርሷል፡፡

የኢትዮጵያ ምርት ገበያ ባለሥልጣን በምርት ገበያው ክፍያ ለሚያስፈጽሙ ተቋማት ዕውቅና መስጠትና አፈጻጸማቸውንም የመቆጣጠር ሥልጣን በአዋጅ የተሰጠው ሲሆን፣ ይህን ኃላፊነትም ባንኮቹ በየዕለቱ በምርት ገበያው አባላትና ደንበኞቻቸው ለግዥ ወደ ባንኩ ገቢ የተደረጉ ገንዘቦችንና ከሽያጭ በኋላ ወጪ የሚያደረጉ ገንዘቦችን በአግባቡ መካሄዳቸውን ይቆጣጠራል፡፡

https://www.ethiopianreporter.com/article/20022 

https://ethiocta.gov.et